Im Stedtli, dert am Läubli-Platz,
gits e Papeterie.
Chasch tuusig Sache choufe dert:
Was darf's de öppe sy?
Vo A bis Z fingsch alles schnäll,
was dir zum Schribe dient.
U ds Schönschte i däm Lade isch:
du wirsch ganz toll bedient.

(Refrain)
Bir Mirjam u bir Annette,
bir Sandra, das isch wahr,
bim Dorly u bim Vreni,
da füelsch di wunderbar.

Es het emal e Fülli gä
ir der Papeterie.
U ds Bsundere a däm Schribwärchzüg:
verliebt isch äs grad gsy
i die füf Froue mitenand;
es isch fasch wie ne Quau.
Ou z'Nacht het är no vo ne tröimt
u g'süüfzget Mal für Mal.

(Refrain)
Bir Mirjam u bir Annette,
bir Sandra, das isch wahr,
bim Dorly u bim Vreni,
tröimt är so wunderbar.

Da chunnt uf ds Mal ä Maa derhär
u het dä Fülli g'chouft.
Die Froue hets natürlech gfröit,
dass ires Gschäft so louft.
Dr Fülli aber, oh herrje,
dä wott das nid verschta.
's cha doch nid si, dass är jitz da
die Froue mues verla.

(Refrain)
Bir Mirjam u bir Annette,
bir Sandra, das isch wahr,
bim Dorly u bim Vreni,
het är's doch wunderbar.
 

Doch wo dä Herr bi sich dehei
e Charte schriibe wott,
da bockt der Fülli, spöit u sprützt;
der Maa chunnt bös i d'Chrott.
Der Fülli schriibt nid, 's nützt alles nüt.
Si Bsitzer resigniert.
Er het ne id Papeterie
du schliesslech zruggschpediert.

(Refrain)
Bir Mirjam u bir Annette,
bir Sandra, das isch wahr,
bim Dorly u bim Vreni,
das isch doch wunderbar.

Im Gschäft, da überchunnt dr Maa
en andre als Ersatz.
Der Fülli, wo nid schriibe wott,
blibt halt am Läubliplatz.
U ds Ändi vo der Gschicht isch klar,
jitz isch är wider dört,
deheime ir Papeterie,
wo-n-är doch häre ghört.

(Refrain)
Bir Mirjam u bir Annette,
bir Sandra, das isch wahr,
bim Dorly u bim Vreni,
füelt är sich wunderbar.